Námskeiðslýsing

​

Sköpunargleði er orð sem segir okkur að það er gaman að skapa. Við upplifum mikla gleði þegar við finnum að hugmyndir flæða í máli og myndum og það er eins og opnist inn í nýjan heim sem við vissum ekki að við hefðum aðgang að. Sköpunarkraftur eru annað orð sem segir okkur að við finnum fyrir aukinni orku þegar við erum skapandi. Á þessu námskeiði notum við spuna, ritlist og allskonar aðferðir og leiki til að opna fyrir sköpunarflæðið og segja sögu.

Sköpun er allskonar og alls staðar en á þessu námskeiði vinnum við aðallega með sögur..

Við spinnum sögur úr eigin lífi eða ímyndaðar í máli og riti.  Við spinnum, segjum frá og skrifum þær niður.  Við notum allskonar kveikjur og leiki sem koma okkur á stað í flæði. Teiknum ,málum, hugleiðum, hlustum á  tónlist og notum allskonar hluti sem stökkpall inní sögu eða ævintýraheim. Lærum að hlusta á hjartað frekar en hugann og tengjum við innsæið. Virkjum öll skynfærin eins og sjón, heyrn og lykt sem kveikju að sögu eða minningu. 

Farið verður lauslega í uppbyggingu á sögu og karaktersköpun.  Unnið er saman í hóp eða í pörum og við deilum og tjáum okkur um verk og upplifun hvers annars.

Markmiðið er að losna við gagnrýnandann í höfðinu með allskonar æfingum sem byggðar eru á spuna, leiklist, sagnalist og ritlist.  Við leikum okkur, sköpum og skemmtum okkur. Reynum að nálgast barnið í sjálfum okkur en börn skapa og leika sér án þess að hugsa um hvernig þau koma fyrir eða hvernig lokaútkoman er. Þau upplifa bara gleðina við að skapa. Þannig má segja að sköpunarferlið sé eins konar núvitund eða hugleiðsla þar sem aðeins gleðin í núinu er til staðar.

Námskeiðið er að langmestu leyti verklegt

​

Kennari er Ólöf Sverrisdóttir

Skráning: iceolof@gmail.com